Are Ye Sleepin' Maggie
Mirk and rainy is the nicht,
There's no a staurn in a' the carry;
Lightnings gleam athwart the lift,
And winds drive wi' winter's fury.
Chorus:
O, are ye sleepin', Maggie?
O, are ye sleepin', Maggie?
Let me in for loud the linn
Is roarin' o'er the warlock craigie.
Fearfu' soughs the boortree bank,
The rifted wood roars wild and dreary.
Loud the iron yett does clank,
And cry of howlets makes me eerie.
Abune my breath I daurna speak
For fear I rouse your waukrife daddie;
Cauld's the blast upon my cheek,
O rise, rise my bonnie lady.
She oped the door, she let him in,
He cuist aside his dreepin' plaidie.
'Blaw your warst, ye rain and win',
Since, Maggie, now I'm in aside ye.
Final chorus:
Now since ye're wauken, Maggie,
Now since ye're wauken, Maggie,
What care I for howlet's cry,
For boortree bank or warlock craigie!